കേരളീയം 2013

-->

2012 നവംബര്‍ 7 മുതല്‍ 2013 ജനുവരി 5 വരെ ജ്ഞാനോദയ വായനശാലയും,ജ്ഞാനോദയ കലാസാംസ്കാരിക വേദിയും സംയുക്തമായി സംഘടിപ്പിച്ച   കേരളീയം 2013 ന്റെ പരിസമാപ്തി 5/1/13 ന് വായനശാലാ ഗ്രൗണ്ടില്‍ , അഭിനയ ചക്രവര്‍ത്തി ശ്രീ.തിലകന്റെ നാമധേയത്തില്‍ തയ്യാറാക്കിയ തുറന്ന വേദിയില്‍ നടന്നു.

അംഗന്‍ വാടികളിലെ കൊച്ചു കലാകാരന്മാരുടെ നൃത്തനൃത്യങ്ങളോടെയാണ് പരിപാടികളുടെ തിരശ്ശീലയുയര്‍ന്നത്. 8 മണിയോടെ നടന്ന ഉദ്ഘാടനച്ചടങ്ങിന് ബഹു.ബാലുശ്ശേരി മണ്ഡലം MLA ശ്രീ. പുരുഷന്‍ കടലുണ്ടി നേതൃത്വം നല്‍കി. രാഷ്ട്രീയ-സാമൂഹിക രംഗങ്ങളിനെ വ്യക്തിത്വങ്ങള്‍ , കലാ സാംസ്കാരിക പ്രവര്‍ത്തകര്‍ എന്നിവര്‍ ഒന്നിച്ചാണ് ഉദ്ഘാടനച്ചടങ്ങിന്റെ നിറദീപത്തിന് തിരി തെളിയിച്ചത്.

പ്രൗഢഗംഭീരമായ ഉദ്ഘാടനച്ചടങ്ങിനു ശേഷം , വായനശാലാ പ്രവര്‍ത്തകനും കലാവേദിയുടെ സജീവാംഗവുമായ ശ്രീ.ഷാലുവിന്റെ നേതൃത്വത്തില്‍ ശിക്ഷണം ലഭിച്ച , ആഴ്ചകളോളമായി പരിശീലനം നേടിയ കുട്ടികളുടെ ദൃശ്യവിരുന്ന് വേറിട്ട അനുഭവമായി. നൂറു കണക്കിനു നാട്ടുകാര്‍ ഒത്തു ചേര്‍ന്ന വലിയ സദസ്സില്‍ , കുട്ടികളുടെ ഓരോ പരിപാടിക്കും നല്ല പ്രോത്സാഹനമാണ് ലഭിച്ചത്.ഇത്തരം സദസ്സുകളില്‍ സാധാരണയായി കണ്ടുവരുന്ന അപശബ്ദങ്ങളോ കമന്റുകളോ ഒരു ഭാഗത്തു നിന്നും ഉയരാതിരുന്നത് , മാസങ്ങളോളമായി ഇതിന്റെ വിജയത്തിനായി അഹോരാത്രം വിയര്‍പ്പൊഴുക്കിയ സംഘാടകര്‍ക്ക് ഉത്തേജനം പകര്‍ന്നു.

കുട്ടികളുടെ വിവിധ കലാപരിപാടികള്‍ക്കു ശേഷം , തൃശ്ശൂര്‍ ജനനയന അവതരിപ്പിച്ച ദൃശ്യ വിസ്മയങ്ങള്‍ നാട്ടുകാര്‍ക്ക് വേറിട്ട അനുഭവമായി.